Давлат хавфсизлик хизмати, ички ишлар ва божхона органлари ҳамкорлигида Фарғона ҳамда Наманган вилоятларида ўтказилган тезкор тадбирлар давомида гиёҳвандлик воситаларининг ноқонуний айланмасига чек қўйилди.
Маълум қилинишича, Фарғона тумани Лоғон МФЙдаги хонадонлардан бири белгиланган тартибда кўздан кечирилган. Текширув давомида 2000 йилда туғилган фуқарога тегишли 993 грамм “гашиш” ва 212 грамм “Альфа-ПВП” гиёҳванд моддалари, шунингдек, 2728 дона “Регапен” ва 458 дона “Тропикамид” кучли таъсир қилувчи дори воситалари аниқланиб, ашёвий далил сифатида расмийлаштириб олинди.
Шу билан бирга, Наманган вилоятида ўтказилган навбатдаги тезкор тадбирда “Тошкент — Наманган” йўналишида ҳаракатланаётган “Спарк” русумли автомашина Чуст тумани ҳудудида тўхтатилиб текширилди. Автомобилда кетаётган Наманган шаҳрида яшовчи 1992 йилда туғилган шахс ҳамда Давлатобод туманида истиқомат қилувчи 1997 йилда туғилган фуқародан 1 килограмм 127 грамм “опий” моддаси олинди.
