Марокаш 2030-йилги Жаҳон чемпионати учун қуришни режалаштирган янги стадион лойиҳасини тақдим этди. Бу ҳақда “The Sun” нашри хабар қилди.
“The Sun” нашрининг ёзишича, стадион Grand Stade de Casablansa деб номланади. Арена трибуналари 115 минг томошабинга мўлжалланган бўлиб, бу сиғими бўйича бошқа майдонлардан каттароқдир.
Стадион Ал-Мансурия шаҳрида қурилади. Марокашликлар ушбу стадион қурилиши орқали Испания ва Португалия билан бирга мезбонлик қиладиган 2030-йилги Жаҳон чемпионати финалини ўтказиш ҳуқуқини қўлга киритмоқчи.
Испания томони ҳам финални Мадрид ёки Барселонада ўтказишга умид қилмоқда.
Эслатиб ўтамиз, футбол бўйича Жаҳон чемпионати илк бор уч қитъада ва олтита давлатда ўтказилади.
2030-йилги Жаҳон чемпионатидаги аксарият ўйинлар Марокаш, Испания ва Португалияда ўтказилади. Жанубий Америкада учта ўйин бўлиб ўтади.
Очилиш ўйини Уругвайда бўлиб ўтади ва маҳаллий терма жамоа иштирок этади. Худди шу ҳолат Аргентина ва Парагвай терма жамоаларининг гуруҳдаги дастлабки ўйинларига ҳам тегишли — улар ўз ватанларида очилиш ўйинларини ўтказишади.
