Қашқадарё вилоятида 2024 йилнинг ўтган олти ойи давомида 1034 нафар ҳайдовчи маст ҳолда машина бошқаргани маълум бўлди. Бу ҳақда вилоят ЙҲХБ бошлиғи Азиз Садиров маълумот берган.
Жорий йилнинг ўтган олти ойи давомида вилоят йўл патрул хизмати инспекторлари томонидан аниқланган жами қоидабузарликлар 172 минг 524 тани ташкил қилган. Шундан қўпол турдаги қоидабузарликлар 62 минг 741 та бўлган, дейди вилоят ЙҲХБ бошлиғи.
Аниқлаштирилишича, маст ҳолда рулга ўтирган ҳайдовчилар 1034 нафар кишини ташкил қилса, 5412 нафар ҳайдовчи тегишли ҳужжатларсиз автомобиль бошқарган.
17 минг 239 нафар ҳайдовчи светафор ишораларига бўйсунмаган бўлса, 886 нафар ҳайдовчи эса ЙПХ ходимига, 35 минг 601 нафари эса йўл белгиларига бўйсунмаган. Қоидабузарликлардан келиб чиқиб, 8281 та автомобиль жарима майдонига жойлаштирилган, дейди масъул.
Қашқадарёда содир бўлаётган йўл-транспорт ҳодисаларининг олдини олиш мақсадида Қашқадарё тажрибаси ҳам ишлаб чиқилган.
Қашқадарё вилояти ИИБ ЖХХ ЙҲХБ томонидан содир этилиши мумкин бўлган йўл-транспорт ҳодисаларининг олдини олиш мақсадида вилоят ҳудудидан ўтувчи автомобиль йўлларида хавфли ҳудуд деб топилган қисмларида Қашқадарё тажрибаси сифатида 17 та “Мобил пост”лар ташкил этилди ва бу борадаги ишлар давом эттирилмоқда, дейди Азиз Садиров.
