Олимлар Хитой жануби-шарқидаги Сзянси провинциясида тошга айланган дунёдаги энг кичик динозавр тухумини топди.
Қайд этилишича, мазкур кашфиёт узоқ вақтдан бери йўқ бўлиб кетган мавжудотлар эволюцияси ҳақида тушунча беради.
“Ушбу динозавр тухумларининг ўлчами кичик, қобиқлари юпқа ва чувалчангсимон тугунлари бор, бу хусусиятлар аллақачон маълум бўлган бошқа тош қотган қолдиқлардан фарқ қилади. Илгари Хитойда топилган энг кичик динозавр тухумининг ўлчами тахминан 45,5 х 40,4 х 34,4 мм бўлган. Мазкур тухумнинг узунлиги эса 29 миллиметрни ташкил этади”, деди Сзянси провинцияси геологик қидирув институти раҳбари Лу Фашенг.
У бошчилигидаги тадқиқотчилар гуруҳи 2021 йилда Гуанчжоу шаҳрида олтита тошга айланган тухумларни топган эди. Уч йил ўтгач, кашфиёт расман тасдиқланди. Иш натижалари Historical Biology журналида чоп этилган. Топилма 80 миллион йил олдинги кеч бўр даврига тегишли экани аниқланган.
“Биз бу тухумларни кичик теропод динозаврига тегишли деб ҳисоблаймиз”, дейди Хитой Геология фанлари университети доценти Хан Фенлу.
Олимларнинг таъкидлашича, бу кашфиёт кеч бўр даврига мансуб тероподлар эволюцияси ва репродуктив усулларини тушунишда катта аҳамиятга эга.
