ДХХ ходимлари томонидан Бош прокуратура ҳузуридаги департамент билан ҳамкорликда ўтказилган тезкор тадбирда Чирчиқ шаҳар ҳокимининг ўринбосари 1 млн доллар олган вақтида ушланди.
Ҳоким ўринбосари хизмат мавқейидан фойдаланган ҳолда, кластер шаклидаги савдо мажмуаси ташкил этиш учун 40 млн доллар инвестиция киритиш шарти билан, шаҳар ҳокимлиги захирасидаги 20 гектар ерни аукцион савдога чиқартириб, ютиб бериш ва 49 йил муддатга ерга эгалик қилиш ҳуқуқини расмийлаштиришда кўмаклашишни ваъда қилган.
Бунинг эвазига 2 млн доллар талаб қилиб, олдиндан 1 млн долларни ўзининг ҳайдовчиси орқали олган вақтида ушланди.
Ҳозирда хизмат мавқейидан фойдаланиб, жуда кўп миқдорда пора олган ҳоким ўринбосарига нисбатан Жиноят кодексининг 210-моддаси 3-қисми “а” банди (Пора олиш жуда кўп миқдорда) билан жиноят иши қўзғатилди ва қамоқ эҳтиёт чораси қўлланилди.
Маълумот учун, Жиноят кодексининг 210-моддаси 3-қисми “а” банди – ўн йилдан ўн беш йилгача озодликдан маҳрум қилиш билан жазоланади.
Тергов ҳаракатлари олиб борилмоқда.
