The Washington Post газетасининг маълум қилишича, Исроил ҳукумати Бразилияда уруш жиноятлари учун терговга тортилган собиқ ЦАХАЛ аскарига қочишга ёрдам берган.
Яҳудий давлатининг собиқ аскари Бразилияда таътилда бўлган вақтида қўлга олинган эди. Собиқ аскарни Ғазо секторидаги ҳарбий жиноятларда айблаган бразилиялик терговчилар гуруҳи ишни судгача етказа олмади. Тергов жараёни даврида Яҳудий давлати разведкаси гумонланувчини Бразилиядан олиб чиқиб кетди.
Якшанба куни Исроил Ташқи ишлар вазирлиги собиқ аскарга ўтган ҳафта тергов бошланганидан сўнг “тижорат парвозида Бразилияни хавфсиз тарк этишига ёрдам берганини” тан олди. Собиқ аскар исроилликларнинг ҳарбий хизмат фаолияти ҳақида ижтимоий тармоқларда постлар ёзишдан огоҳлантирилган.
Ғазода Яҳудий давлати аскари томонидан ўлдирилган 5 ёшли фаластинлик қизча - Ҳинд Ражаб номидаги жамғарма собиқ аскарнинг Ғазодаги ҳарбий жиноятларини исботловчи, хусусан тинч фаластинликларнинг уйларини ноқонуний бузиб ташлаши акс этган далиллар – видео тасвирлар, геолокация маълумотлари ва фотосуратларни Бразилия ҳукуматига тақдим этиб, унга қонуний чора кўришни илтимос қилган эди.
Жамғарма бу ҳаракатни Исроил армиясининг Ғазо секторини вайрон қилиши ва тинч аҳолини геноцид қилиши тарихида "Ғазода содир этилган жиноятлар учун жавобгарлик йўлидаги муҳим қадам" дея таърифлаган. Бразилия расмийлари томонидан ҳозирча расмий изоҳ берилмаган.
Маълумки, Халқаро Жиноят Суди Яҳудий давлати бош вазири Бенямин Нетаняҳу ва унинг собиқ мудофаа вазирини ҳибсга олишга ордер бергани ортидан Исроилнинг Ғазодаги хунрезликлари қаттиқ халқаро танқидларга нишон бўлмоқда. Халқаро суд геноцид айбловларини ҳар бир ҳолат учун алоҳида ўрганиб чиқмоқда.
Бразилиядаги ушбу жараён Исроил армиясининг нафақат юқори мансабдор шахслари, балки оддий аскарлари ҳам хорижда бўлганларида жиноий жавобгарликка тортилиши мумкинлигини кўрсатувчи прецедент бўлди.
