Калифорниянинг Жанубий ҳудудларидаги ёнғинлар оқибатида ҳалок бўлганлар сони 24 кишига етди. Ёнғинлар Лос-Анжелес округида 45 квадрат миллик майдонни қамраб олган бўлиб, уларни ўчириш учун минглаб ўт ўчирувчилар сафарбар қилинган.
Энг йирик ёнғинлардан бири — «Палисейдс» ёнғини — 24,000 акр майдонни ёқиб юборди ва минглаб иншоотларни вайрон қилди; ҳозирда ёнғиннинг атиги 11% назоратга олинган. Шунингдек, Пасадена шимолидаги “Итон” ёнғини 14,100 акрдан ортиқ майдонни қамраб олган ва унинг 27% назоратга олинган. Силмар яқинидаги “Ҳёрст” ёнғини эса 799 акрни ёндириб ўтган. Унинг 89% назоратга олинган.
105 мингга яқин киши мажбуран эвакуация қилинган, яна 87 минг кишига эвакуация қилиниши ҳақида огоҳлантиришлар берилган. Кучли Санта-Ана шамоллари ва қурғоқчилик ёнғинларнинг тарқалишини янада кучайтирмоқда.
Калифорния губернатори Гэвин Ньюсом ёнғинларга қарши курашиш учун қўшимча 1000 нафар миллий гвардия аскарларини сафарбар қилди. Шунингдек, Лос-Анжелес шаҳар мэри ёнғинлардан жабрланганларга ёрдам бериш учун тузилган жамғарма маблағи 6 миллион доллардан ошганини маълум қилди.
Дастлабки ҳисоб-китобларга кўра, ёнғиндан кўрилган зарар 135 дан 150 миллиард долларгача баҳоланмоқда.
Ҳудуддаги мактаблар ёпилган эди, аммо Лос-Анжелес таълим департаменти душанба кунидан бошлаб баъзи мактабларни қайта очишни режалаштирмоқда. Бу қарор мактабларнинг жойлашуви ва ҳаво шароитига боғлиқ бўлади.
АҚШ Метеорология хизмат Жанубий Калифорнияда чоршанба кунигача кучли шамоллар ва ёнғин хавфи ҳақида огоҳлантириш эълон қилди. Шамоллар тезлиги соатига 70 милгача етиши мумкин.
Федерал фавқулодда вазиятлар агентлиги (FEMA) маълумотига кўра, 24 мингдан зиёд киши ёрдам олиш учун рўйхатдан ўтган.
Абдуллоҳ Саййид
