Россия Давлат Думасининг “Адолатли Россия – ҳақиқат учун” фракцияси депутатлари мигрантларнинг пул ўтказмаларига давлат божи жорий этишни таклиф этувчи қонун лойиҳаси устида иш олиб бормоқда. Бу ҳақда партия раҳбари Сергей Миронов маълум қилган.
"Мигрантларнинг пул ўтказмалари учун давлат божини жорий қилиш керак... Агар биз 3 фоизлик бож жорий қилсак, ғазнага фақат икки давлат – Қирғизистон ва Ўзбекистоннинг ўтказмалари ўзидан 45 миллиард рублдан ортиқ маблағ тушади. Наҳотки, бизга шу миқдордаги пул керак бўлмаса?! Биз қонунчилик ташаббусини тайёрлаб, уни Давлат Думасига тақдим этамиз”, — деб ёзади депутат ўзининг Телеграм каналидаги саҳифасида.
