Жорий йилнинг 1-феврал куни Тошкент шаҳрининг Янгиҳаёт туманида эркак ўз хотинига пичоқ билан ҳужум қилди.
Аёлнинг бақиришига қўшниси чиқиб, тез ёрдам чақирган. Шифокорларнинг тезкорлиги туфайли жабрланувчи тирик қолди ва ҳозирда шаҳар шифохоналаридан бирида даволанмоқда.
Жабрланувчининг сўзларига кўра, шу йилнинг 1-феврал куни унинг эри жанжал кўтариб, шундан сўнг унинг танасининг турли жойларига 25 марта пичоқ урган. Низога эркакнинг ўзлари яшаётган хонадонни сотиш нияти сабаб бўлган. У хотинига уйни сотишини, аёлни эса икки боласи билан кўчада қолдиришини айтган.
"Мен ундан буни кутмагандим. Квартирани сотишга қарши эканлигимни айтдим, икки бола билан қаерга боришимни сўрадим? Ва хонага кирганимда, орқамдан биринчи зарбани ҳис қилдим. Мен ундан қилган иши учун энг оғир жазо берилишини сўрайман", - деди жабрланувчи.
Ҳолат бўйича Янгихаёт тумани прокуратураси томонидан одам ўлдиришга суиқасд моддаси бўйича жиноят иши қўзғатилган. Ўзбекистон Республикаси Жиноят кодексининг 25, 97-моддасига асосан, гумонланувчи процессуал тартибда қўлга олиниб, тергов ҳаракатлари олиб борилмоқда.
