Сирдарё вилоятида 5,7 млрд сўмлик табиий газдан ноқонуний фойдаланган метан “заправка”га алоқадор шахслар текширувга келган “Ўзэнергоинспекция” ходимининг машинасига гиёҳванд модда ташлаб кетгани фош этилди. Бу ҳақда “Ўзэнергоинспекция” хабар берди.
Қайд этилишича, жорий йилнинг 8 февраль куни “Ўзэнергоинспекция” марказий аппарати мутахассислари томонидан Сирдарё вилояти, Сирдарё туманида жойлашган “П.М.Г.” МЧЖга қарашли АГТКШДА назорат тадбири ўтказилган.
Мутахассислар томонидан АГТКШнинг газ ҳисоблагичини кўздан кечиришга борилганда, шохобчанинг газ ҳисоблагичи ўрнатилган хонадан номаълум шахс қўлида ҳар хил кабеллар билан чиқиб, ушбу жойдан қочиб кетган. Шундан сўнг, газ ҳисоблагич кўздан кечирилганда ҳисоблагичнинг алоқа тармоғи узилмаганлиги кузатилиб, ҳисоблагичга ташқи таъсир кўрсатилгани шубҳа қилиниб, ҳисоблагич конфигурацияларини текширтириш учун ечиб олиниши билдирилганда, АГТКШ раҳбарлари томонидан тўсқинлик қилинган ва ҳисоблагични ечиб олишга қаршилик кўрсатилган.
Шу вақтда кутилмаганда Сирдарё тумани ИИБ тезкор вакили келиб, “Ўзэнергоинспекция” мутахассиси A.Н.га тегишли автомашинани кўздан кечириб, шубҳали равишда номаълум модда топиб, воқея жойидан мутахассисни олиб кетган.
Ушбу ҳолат юзасидан ҳуқуқни муҳофаза қилувчи органлар томонидан ўтказилган текширувларга кўра, АГТКШ тегишли шахслар томонидан қасддан уюштиргани аниқланган.
Қолаверса, тадбир давомида, жамиятга қарашли газ ҳисоблаш ускунасини маълумотлар базасига ташқи таъсир кўрсатилганлиги ҳам аниқланган.
Дастлабки ҳисоб-китобларига асосан давлат манфаатларига етказилган зарар миқдори 5 млрд 740 млн сўмни (2,2 млн м3) ташкил этган.
Аниқланган ҳолат юзасидан тўпланган ҳужжатлар ҳуқуқий баҳо бериш учун прокуратура органига юборилган.
Маълумот учун, ушбу тадбиркорлик субъектида табиий газдан ноқонуний фойдаланиш такроран содир этилган бўлиб, яъни инспекция мутахассиси томонидан 2024 йилда мазкур АГТКШ раҳбарига қарашли Сирдарё вилоятида жойлашган 2 та АГТКШда (“С.А.Л.” ва “М.Г.” МЧЖлар) табиий газдан ноқонуний фойдаланиш ҳолатларини аниқлаб, жами 28,3 млрд сўмлик зарар ҳисоб-китоб қилинган.
