Покистонда «Белужистон озодлик армияси» сепаратистлари ичида 400 нафарга яқин одам бўлган йўловчи поездига ҳужум қилди. Жангарилар поезд йўловчиларини гаровга олганликларини иддао қилиб, ўз талаблари бажарилмаса, уларни ўлдириш билан таҳдид қилмоқда.
Ҳужум Jaffar Express компаниясига тегишли поездга қилинди. У Кветта шахридан Равалпиндиига йўл олган бўлиб, ҳодиса мамлакатнинг жануби–ғарбида, Белужистон вилоятида содир бўлган.
Жангарилар ҳаракатлари натижасида поезд ҳаракатланиши тўхтатилган. Reuters агентлигининг маълум қилишича, таркиб ҳозирги вақтда тоннел ичида турибди. AFP агентлиги эса полиция вакилларига таяниб, поезднинг тоғли ҳудудда тоннелга киришидан олдин тўхтатилганини хабар қилди.
Полиция маълумотига кўра, ҳодиса содир бўлган ҳудуд яқинида портлаш ва ўқ овозлари эшитилган. Маҳаллий ҳокимиятлар маълумотларига кўра, поезд тўхтатилган ҳудудда мобил алоқа ва интернет йўқ.
Белужистон озодлик армияси баёнотида айтилишича, жангарилар поезддаги йўловчилар билан бирга ҳужумга қарши чиққан кучларни ҳам гаровга олган. Улар, агар полиция ва ҳарбийлар ортга чекинмаса, гаровдагиларни ўлдиришини билдирди.
Власти ҳозирча гаровга олинганлар ҳақида расмий тасдиқ бермади. Полициянинг маълум қилишича, отишма вақтида поезд машинисти яраланган.
Ҳукумат вакилларига кўра, ҳужум содир бўлган ҳудудга қўшимча хавфсизлик кучлари юборилган. Белужистон ҳукумати вакили маҳаллий Dawn нашрига берган интервьюсида ҳарбийлар ва жангарилар ўртасида шиддатли отишма кетишаётганини маълум қилган.
Покистон ички ишлар вазири Моҳсин Накви поездга ҳужумни кескин қоралаб, ҳукумат «беайб йўловчиларга ўқ узган ваҳшийларга имтиёз бермаслигини» таъкидлади.
Маълумки, «Белужистон озодлик армияси» 1970-йилларнинг бошларида ташкил топган сепаратистик гуруҳ бўлиб, Белужистоннинг мустақиллигини тан олиш ва минтақанинг барча ресурсларини тўлиқ назорат қилишни талаб қилади. У АҚШ, Британия ва Европа Иттифоқига аъзо давлатлар томонидан террористик ташкилот сифатида тан олинган.
Ўтган йили АОБ жангарилари Белужистон вилоятида бир қатор қўрқинчли терактларни амалга оширган.
2024 йил ноябрь ойида жангарилар Кветта темир йўл бекатида поездни портлатиб юборган, натижада ўнлаб одам ҳалок бўлган, яна ўнлаб одам яраланган эди.
Абдуллоҳ Саййид
