Тошкент шаҳар ИИББ Матбуот хизмати хабарига кўра, Тошкент шаҳар Учтепа туманида жойлашган “Mahdiy turizm” МЖЧ ходими 1995 йилда туғилган А.Ж. тўрт нафар фуқарога “Ҳаж” сафарига юборишни ваъда қилган.
А.Ж. МЧЖнинг ушбу фаолият тури билан шуғулланишга лицензияси йўқлигини била туриб, улардан алдов йўли билан 27,200 АҚШ долларини олаётган пайтида ашёвий далиллар билан қўлга олинган.
Яна бир ноқонуний ҳолат пойтахтнинг Шайхонтоҳур туманида қайд этилган. “Sohil turizm” МЖЧ директори 1991 йилда туғилган С.Н. икки нафар фуқаронинг ишончига кириб, уларни “Ҳаж” сафарига юборишни ваъда қилиб, бундай фаолият тури билан шуғулланишга лицензияси бўлмасада, 10,000 АҚШ долларини олган вақтида холислар иштирокида ушланган.
Мазкур ҳолатлар юзасидан тўпланган ҳужжатлар қонуний қарор қабул қилишлик учун Иқтисодий жиноятларга қарши курашиш департаментига тақдим этилди.
"Ҳурматли фуқаролар, агар сиз ушбу шахслардан ва сайёҳлик фирмаларидан жабр кўрган бўлсангиз Тошкент шаҳар ИИББ нинг 71-206-43-02 рақамига ёки 102 рақами орқали мурожаат қилишингизни сўраймиз", дейилади хабарда.
