"United Airlines" авиакомпаниясига тегишли Boeing 737-800 самолёти Денвердан Канадага йўл олган чоғида моторда ёнғин чиққани сабаб мажбурий қўнишни амалга оширди.
Экспертларнинг аниқлик киритишича, ушбу воқеа қуённинг самолёт турбинасига кириб қолиши билан боғлиқ.
United авиакомпаниясининг 2325-рейси якшанба куни Денвердан Канададаги Эдмонтон шаҳрига 153 нафар йўловчи ва 6 нафар экипаж аъзоси билан учиб чиққан эди.
АҚШнинг ФАМ (Федерал авиация маъмурияти) маълумотига кўра, экипаж учиш вақтида ҳайвонга урилиб кетганини хабар қилган. Қайси ҳайвон экани аниқ айтилмаган, бироқ воқеа вақтида йўлакда қўйлари билан бирга қуёнлар югуриб юргани қайд этилган.
"Йўлакда қуёнлар фаоллигига эҳтиёт бўлинг", — деб бошқа учувчиларни огоҳлантирган диспетчер. "Қуён югуриб кетаётгани... сизнинг учиш йўналишингизга қараб кетаяпти."
"Эҳтимол, уни босиб ўтгандирмиз", — деб айтган United’нинг бошқа учувчиси диспетчерга.
"Биз улардан каттароқмиз-ку", — деб ҳазил қилган Frontier авиакомпанияси учувчиси.
Бироқ United 2325 учун бу ҳазил эмасди. "Қанотимизда ёнғин чиққани ҳақида хабар олдик", — деб айтган United 2325 рейси учувчиси фавқулодда ҳолат эълон қилиб, аэропортга қайтиш ва айланиб келиш режасини баён этган.
Denver аэропорти жамоатчилик билан алоқа бўйича масъули Кейлен Виллагрананинг CNN’га айтишича, ёнғин машиналари одатий тартибда чақирилган.
Самолёт кейинроқ хавфсиз равишда жойига қайтиб, йўловчилар бошқа самолётга ўтказилди ва улар Эдмонтонга учиб кетишди.
ФАМнинг ёввойи табиат билан тўқнашувлар маълумотлар базасига кўра, ўтган йили Денвер халқаро аэропортида самолётлар 800 маротаба ҳайвонларга урилиб кетган. Бу тўқнашувларнинг кўп қисми қушлар билан содир бўлган. Шунингдек, баъзи ҳолларда самолётлар итлар, каламуш, эчкиэмар ва қуёнларга ҳам урилиб кетган.
Абдуллоҳ Саййид
