Россиянинг Нижний Новгород вилоятида яшовчи Анастасия Синицина "Рапидо Про" лотереясида сунъий интеллект ёрдамида 36 миллион рублдан ортиқ маблағ ютди. Бу ҳақда "Столото" компанияси хабар берди.
"Столото" маълумотига кўра, дастлаб қиз мобил иловани юклаб олиб, билетлар рақамини таваккал белгилаб харид қилиб юрган. Кейинроқ эса рақамлар комбинациясини танлашда нейротармоққа мурожаат қилишга қарор қилган. Сунъий интеллект унга биринчи қатор катаклари учун — 18, 20, 3, 9, 5, 14, 12, 7 рақамларини; иккинчи қатор учун — 2 рақамини белгилашни тавсия этган. Бу комбинация 325 497-сонли тиражда унга 36 151 743 рубллик суперютуқни олиб келди. Бу ҳозирги валюта алмашув курсида 441 924 долларга тенг бўлади.
Шунингдек, Анастасия бир гороскопни ўқиганини, у ерда унинг буржи учун айнан "Рапидо Про" лотереясида омад кулиб боқиши мумкинлиги ёзилганини айтди.
Анастасия ютуқдан олинган пулларни уй сотиб олиш, онасига таъмирлаш ишларида ёрдам бериш, Хитойга саёҳат қилиш, шунингдек, ноутбук ва маиший техника харид қилиш учун сарфлашни режалаштирмоқда.
2025 йил 20 апрель куни “Миллий Лотерея” матбуот хизмати маълум қилишича, “Мечталлион” деб номланган илк тиражда ўн нафар россиялик 10 миллион рублдан ютиб олган. Яна 17 киши ҳар бири 1 миллион рубллик совринга эга бўлган.
“Бугунги кунда флагман лойиҳамиз тарихида 100 миллион рубль жами 11 марта ўйналди (2022 йил октябридан буён)”, — дейилади “Миллий Лотерея” матбуот хизматининг баёнотида.
Абдуллоҳ Саййид
