Жанубий Корея разведкаси КХДР етакчиси Ким Чен Ин Россия президенти Владимир Путинга яна бир “совға” юборганини маълум қилган. Аввалроқ қурол ва ҳарбий куч билан ёрдам берган Пхенян эндиликда Россияга меҳнат мигрантларини ҳам юбормоқда.
Шимолий Кореядан 15 мингга яқин ишчи Россияга жўнатилган. Улардан кўпчилиги мамлакатга талабалар визаси билан кирган. Ишчилар асосан Россиянинг Узоқ Шарқ ҳудудларида ишламоқда. Шу билан бирга, маҳаллий бизнес вакиллари ва расмийлар яқин орада шимолий кореялик ишчилар Москвага ва бошқа йирик шаҳарларга ҳам келишидан умидвор.
Иш берувчилар уларни паст иш ҳақи эвазига ҳар куни 12 соатлаб эътирозсиз ишлашга тайёрлиги сабабли қадрлашини билдирган.
WSJ манбасига кўра, 2024 йилда Россияга кириб келган шимолий кореяликлар сони ўтган йилга нисбатан 12 баробарга ошган. Бу эса БМТ Хавфсизлик Кенгаши томонидан белгиланган санкцияларга зид бўлиб, Пхенян меҳнат мигрантларини хорижда ишлатишни тақиқлаган. Шунга қарамай, Россия ва Хитой ушбу чекловларни бир неча бор бузган.
