Аргентина Олий судининг ертўла қисмидан нацистлар даврига оид 83 та қути ҳужжат – очиқчалар, суратлар ҳамда тарғибот материаллари топилди. Бу ҳақда “Der Spiegel” нашри маҳаллий ОАВга таяниб хабар берди.
Топилмаларни тартибга келтириш жараёнига Буэнос-Айресдаги “Холокост” музейи мутахассислари жалб этилган.
Суд ҳужжатларига кўра, ушбу материаллар 1941 йил июнь ойида Япония пойтахти Токиодаги “учинчи рейх” элчихонаси томонидан Аргентинага жўнатилган. Мақсад – Гитлер мафкурасини Жанубий Америка минтақасида тарғиб қилиш бўлган.
Аммо юк келиб тушганидан сўнг Аргентина ҳукумати уни мусодара қилган, чунки мазкур материалларнинг тарқалиши мамлакатнинг Иккинчи жаҳон урушидаги бетарафлигига таҳдид солиши мумкин эди.
1945 йилда Германиянинг мағлубиятидан сўнг кўплаб нацист амалдорлари Аргентинага қочиб келгани маълум. Шу йили Аргентина Миллий архиви Адолф Эйхман ва Ёзеф Менгеле каби уруш жиноятчиларига оид 1850 та ҳужжатни эълон қилди.
