Савдо-саноат палатаси раиси Даврон Вахобов бошчилигидаги мамлакатимиз ишбилармон доиралари вакилларидан иборат делегациянинг Кобулга сафари доирасида Ўзбекистон-Афғонистон бизнес-форуми ва "В2В" шаклидаги учрашувлар ташкил этилди, деб хабар қилмоқда "Дунё" АА мухбири.
Форумнинг очилиш маросимида Афғонистон саноат ва савдо вазирининг ўринбосари Аҳмадуллоҳ Зоҳид сўзга чиқиб, Ўзбекистон Президентининг Афғонистон бўйича амалга ошираётган ташқи сиёсати, ҳамкорлиги ва халқаро майдонда афғон халқини ҳар томонлама қўллаб-қувватлаш борасида олиб бораётган саъй-ҳаракатларини юксак баҳолади. У, шунингдек, "Термиз халқаро савдо маркази", Кобул ва Мозори-Шариф шаҳарларида "Ўзбекистон савдо уй"лари очилганини эътироф этган ҳолда, мазкур тармоқлар имкониятларидан икки мамлакат бизнес вакиллари унумли фойдаланишлари муҳимлигини таъкидлади.
Савдо-саноат палатаси раиси Даврон Вахобов ўз навбатида мамлакатларимиз ҳукуматлари сай-ҳаракатлари туфайли сўнгги йилларда Ўзбекистон ва Афғонистон ўртасидаги савдо ҳажми сезиларли даражада ошганини урғулади.
Афғонистон савдо ва инвестициялар палатаси раиси Муҳаммад Юнус Моманд Ўзбекистон ва Афғонистон ўртасидаги савдо-иқтисодий муносабатларнинг фаол ривожланиб бораётганини алоҳида таъкидлаб, афғон тадбиркорларига яратилаётган имтиёзлар учун Ўзбекистон раҳбариятига миннатдорлик билдирди.
Расмий тадбирдан сўнг 96 нафар ўзбекистонлик ва 110 нафар афғон тадбиркорлари иштирокида бизнес-форум ва "B2В" учрашувлар ташкил этилди. Мулоқот чоғида озиқ-овқат, электротехника маҳсулотлари ва қурилиш материаллари соҳасида қўшма лойиҳаларни амалга ошириш истиқболлари муҳокама қилинди.
Музокаралар якунида икки давлат ишбилармонлари ва компаниялари ўртасида умумий қиймати 45 миллион АҚШ долларига тенг бўлган 16 та битим имзоланди.
