Бугун, 15 май куни Украина Президенти Владимир Зеленский Туркияга ташрифи доирасида Анқарада Президент Ражаб Тойиб Эрдўған билан учрашди. Бу ҳақда “Анадолу” хабар берди.
Маълум қилинишича, Зеленский Туркияга етиб келганидан сўнг Эсенбўға аэропортидан тўғри Президент саройига йўл олган.
Президент Ражаб Тойиб Эрдўған Зеленскийни Президентлик соройи кириш қисмида кутиб олган. Икки давлат раҳбари зинапояда Туркия ва Украина байроқлари фонида суратга тушган.
Ёпиқ эшиклар ортида бўлиб ўтган учрашувда Туркия Миллий мудофаа вазири Яшар Гулер, Миллий разведка ташкилоти раҳбари Иброҳим Калин ҳамда Президентнинг ташқи сиёсат ва хавфсизлик бўйича бош маслаҳатчиси Акиф Чағатай Қилич иштирок этган.
Президент Эрдўған ва Зеленский ўртасидаги икки томонлама музокаралардан сўнг, делегациялар ўртасида ишчи кечки овқат ташкил этилиши режалаштирилган.
Эрдўған ва Зеленский учрашувида Россия-Украина уруши доирасидаги сўнгги вазият ҳар томонлама муҳокама қилиниши кутилмоқда.
Қолаверса, музокаралар доирасида Президент Эрдўған Туркиянинг позициясини – имкон қадар тезроқ ўт очишни тўхтатиш ва тинчлик музокараларини бошлаш зарурлигини яна бир бор таъкидлаши кутилмоқда.
Расмий хабарларга кўра, Анқарага келгач, аэропортда қилган чиқишида Украина Президенти Зеленский Истанбулда ўтказилиши кутилаётган Россия-Украина музокараларини баҳолаган.
“Аввало, Президент Эрдўғанга тўғридан тўғри музокаралар ўтказилишига имкон яратгани учун миннатдорлик билдираман”, деган Зеленский.
Шунингдек, у Россия делегацияси ҳақиқий тинчликка эришишни хоҳламаётганини айтган.
“Россия томони вакиллик даражаси деярли кўзбўямачиликка ўхшайди. Президент Эрдўған билан учрашувдан сўнг кейинги қадамларимизни белгилаймиз. Россия вакилларининг ваколат доираси қандай эканини тушуниб олишимиз зарур, чунки у ерда қарорларни ким қабул қилиши ҳаммага аён”, деган Украина раҳбари.
