Ҳиндистонда антибиотиклар етишмаслиги оқибатида аҳоли орасида хавфли инфекцияли касалликларга чалиниш ҳолатлари кўпайиб кетган. Бу ҳақда BBC хабар берди.
Ҳиндистон, Бразилия ва Жанубий Африкани ўз ичига олган саккизта асосий паст ва ўрта даромадли мамлакатларда тадқиқот ўтказилди. Унда CRGN инфекцияларининг (супербактериялар) антибиотикларга чидамлилигиўрганилган. Бактерияларга қарши фаол бўлган саккизта дорининг таъсири баҳоланган.
Улар қаторида эски антибиотиклардан тортиб, Colistin ва Cеftazidimе-аvibactam каби янги препаратларгача бор. Уларнинг орасида Тигетциклин энг кенг қўллангани ҳисобланади. Тадқиқот давомида беморларнинг атиги 6,9 фоизиушбу дорилар ёрдамида шифо топгани аниқланган.
Ҳиндистон CRGN инфекциялари тарқалиши бўйича биринчи ўринда туради. Мамлакат тадқиқ қилинган антибиотикларнинг 80 фоизини сотиб олган. Лекин касалланганларнинг атиги 7,8 фоизини даволай олган, холос.
Бу бактериялар сувда, овқатда, атроф-муҳитда ва инсон ичагида учрайди. Улар сийдик йўллари инфекцияси, зотилжам ва овқатдан заҳарланиш каби касалликларни келтириб чиқариши аниқланган. Айниқса, янги туғилган чақалоқлар ва ёши катталар хавф остида бўлади. CRGN (Карбапенемга чидамли грам-манфий) инфекцияларни даволаш икки баравар қийин, чунки улар энг кучли антибиотикларга ҳам қаршилик кўрсата олади.
“Бу инфекция турли ёшдаги беморларда ҳар куни учрамоқда. Кўп ҳолларда ҳеч қайси антибиотик таъсир қилмаяпти ва беморлар вафот этмоқда”, деди юқумли касалликлар доктори Абдул Гаффар.
