Россия яқин кунларда Украинага қарши “кенг қамровли, кўп йўналишли зарба” бериши мумкин. Бу ҳақда АҚШ разведкаси вакилларига таяниб, "Reuters" агентлиги хабар берди.
Унга кўра, ушбу ҳаракат Украина махсус хизматлари томонидан ўтказилган “Тўр” (Паутина) операциясига жавобан амалга оширилиши кутилмоқда. Мазкур операция давомида бир неча ўнлаб Россиянинг қанотли ракеталарни ташувчи стратегик воситалари йўқ қилинган ёки жиддий зарар кўрган.
Америкалик расмийлар бу ҳужумни “ассиметрик” ва “аралаш услубдаги” зарба сифатида тасвирламоқда — унда баллистик ракеталар ва дронлар иштирок этиши мумкин. Ғарбий дипломатик манбаларга кўра, эҳтимолий ҳужумлар Кйивдаги давлат муассасалари ва стратегик объектларга қаратилади.
Карнеги жамғармасининг Россия бўйича эксперти Майкл Кофман Россия ўрта масофали баллистик ракеталардан фойдаланиши, СБУ штаб-квартираси ёки минтақавий разведка идораларига ҳужум қилишга уриниши мумкинлигини тахмин қилмоқда.
Бироқ у Россиянинг ҳарбий салоҳияти аллақачон жиддий даражада сафарбар этилганини таъкидлайди ва бу унинг имкониятларини чеклаб қўйганини қайд этади.
