BBC хабарига кўра, АҚШ президенти Доналд Трамп Бразилияда ишлаб чиқарилган маҳсулотларга 50 фоизлик импорт божи жорий этилишини маълум қилди. Аввал бу бож 10 фоиз бўлган эди. Трамп бу қарорини ижтимоий тармоқда эълон қилган ва Бразилияга расмий мактуб юборган.
Мактубда Трамп Бразилия ҳукуматини “АҚШ технология компанияларига ҳужумлар”, “сўз эркинлигига тўсқинлик қилиш” ва “эркин сайловларга босим ўтказиш”да айблаган. У, шунингдек, бразилиялик расмийларни ижтимоий тармоқларга цензура ўрнатишда ва Илон Маскнинг X платформасини блоклаганликда айблаган.
Маълумот учун, Бразилия ҳукумати 2022-йилги президентлик сайловларида нотўғри ахборот тарқатаётган ҳисобларни ўчиришга қаршилик кўрсатгани учун X платформасини вақтинча чеклаганди. Яқинда эса Олий суд тармоқларни фойдаланувчи контентига жавобгар деб топди.
Трамп, айниқса, собиқ Бразилия президенти Жаир Болсонаруга нисбатан давом этаётган суд ишини “халқаро шармандалик” деб атаб, суд жараёнини тўхтатишни талаб қилган. У Болсонаруни “жуда ҳурмат қилиши”ни айтган.
Лекин Бразилия президенти Луис Инасиу Лула да Силва Трампнинг баёнотларига кескин муносабат билдирди. “Ҳеч ким қонундан устун эмас”, — деди у. Лула, шунингдек, Трампнинг бож қарорига жавобан чора кўрилишини ҳам айтиб ўтди.
Трамп бу ҳафта Япония, Жанубий Корея ва Шри Ланка каби давлатларга ҳам янги бож ставкаларини жорий этган, аммо Бразилияга юборилган мактуб бошқалардан кескинроқ бўлган.
Айни пайтда Трамп ва Лула ўртасидаги бу сиёсий тортишув АҚШ—Бразилия муносабатларини кескинлаштириб юбориши мумкин.
