Президент Шавкат Мирзиёев Шайхонтоҳур ва Чилонзор туманларига ташриф буюриб, бу ҳудудларда амалга оширилган қурилиш ва ободонлаштириш ишлари билан танишди. Ташриф чоғида Бунёдкор кўчасининг 1,5 километрлик қисми тубдан ўзгартирилгани таъкидланди — эндиликда бу маскан 24 соат фаолият юритадиган хизмат ва гастротуризм марказига айланган.
Янги иш ўринлари ва тадбиркорлик
Бу ҳудудда 90 та тадбиркорлик субъекти фаолият кўрсатмоқда, уларнинг 45 таси янгидан ташкил этилган. Аҳамиятлиси, уларнинг барчаси 24 соатлик иш режимида ишлайди. Натижада 500 киши доимий иш билан таъминланган.
Ободонлаштириш ва қулайликлар
Янги Бунёдкор кўчасида ландшафт дизайни, ёритиш тизимлари, фавворалар ўрнатилган, шунингдек, овқатланиш, юриш ва дам олиш учун барча зарурий шароитлар яратилган.
Маҳалла ва аҳоли манфаатдор
Яқин атрофдаги Камолон, Янги Камолон ва Камолон дарвоза маҳаллаларида истиқомат қилувчи 18 минг нафар аҳоли учун шароитлар яхшиланди. Шунингдек, бу ҳудудга ташриф буюрувчилар сони йилига 1 миллион нафарга етказилиши режалаштирилмоқда.
Янги туризм маркази сари
Бунёдкор кўчаси Тошкент шаҳридаги туризмга ихтисослашган гавжум ҳудудлар қаторига қўшилди. Келгуси йилларда пойтахт бўйлаб яна 26 та кўчани шундай форматда ривожлантириш ва 1 000 та 24 соатлик савдо нуқтаси ташкил этиш режалаштирилган.
Тошкентдаги бу янгиланишлар нафақат шаҳарнинг кўркини очмоқда, балки иш ўринлари, тадбиркорлик ва туризм ривожига хизмат қилмоқда.
