Украинани урушдан кейин тиклаш учун 10 миллиард евро ажратилади. Бу ҳақда Deutsche Welle нашри хабар берди.
Римда бўлиб ўтаётган Украинани урушдан кейинги қайта тиклаш бўйича 4-халқаро конференция иштирокчилари Киевга ёрдам бериш учун 10 миллиард евродан ортиқ маблағ ажратишга ваъда берди.
"Бугунги конференцияда биз Киевга биргаликда 10 миллиард евродан ортиқ ёрдам ажратиш бўйича мажбуриятларни олдик", — деди Италия бош вазири.
Жоржа Мелони, шунингдек, россиялик ҳарбийлар томонидан Украина черковлари ва музейлари вайрон қилинганини кескин танқид қилди.
"Ушбу маданий қадриятлар умумий Европа меросининг бир қисми бўлиб, улар қайта тикланади", — дея Мелонининг сўзларини келтиради KNA агентлиги.
Ўз навбатида, Германия канцлери Фридрих Мерц мазкур конференсияда нутқ сўзлаб, Украинани тиклаш бўйича Европа флагман жамғармаси ишга туширилишини эълон қилди.
Мерцнинг сўзларига кўра, Киевни халқаро миқёсда қўллаб-қувватлаш, Украинанинг Европа Иттифоқига аъзо бўлишга интилиши ва уни тиклашда хусусий капиталнинг иштироки урушдан кейин мамлакатда “иқтисодий мўъжиза”га эришишнинг асосий учта шарти ҳисобланади.
