АҚШ президенти Дональд Трамп Украинага бир неча миллиард долларлик янги молиявий ёрдам ажратиши мумкин. Бу ҳақда CBS News дипломатик манбаларга таяниб хабар берди.
Манбаларга кўра, бу ёрдам “сўнгги кунларда Украинага қарши дронлар ва ракеталар билан зарба берган Россияга аниқ сигнал бўлиши мумкин”.
Ёрдам миқдори аниқлаштирилмаган бўлса-да, Трамп ихтиёрида ҳали ҳам Байден президентлиги давридан қолган 3,85 миллиард доллар мавжуд бўлиб, бу маблағ Украина томонига АҚШ ҳарбий техникасини етказиб бериш учун сарфланиши мумкин.
Бундан ташқари, АҚШ ҳукумати Россиянинг хорижда музлатиб қўйилган қарийб 5 миллиард долларлик активларини мусодара қилиб, Украинага йўналтириши ҳам мумкин. Аммо ҳозирга қадар на Байден, на Трамп бу ваколатдан фойдаланган.
Бу каби эҳтимолий молиявий чоралар Россияга босимни кучайтириш ва Украинани ҳарбий жиҳатдан қўллаб-қувватлаш стратегиясининг бир қисми сифатида кўрилмоқда.
