Россия Ташқи разведка хизмати маълум қилишича, Украина президенти Владимир Зеленский Европа давлатларидаги ҳамкорларига Украина Қуролли Кучларининг жанговар салоҳияти ҳали ҳам сақланиб қолганини кўрсатишга интилмоқда.
Шунингдек, Киев Россия иқтисодиёти ва орқа фронт ҳудудларига сезиларли зарар етказиш имконияти борлигини намоён қилишни мақсад қилгани айтилмоқда.
Разведка маълумотларига кўра, Украина Россия ҳудудига янги турдаги ҳужумлар тайёрламоқда. Хусусан, дронлар ёрдамида амалга оширилиши мумкин бўлган зарбалар учун Болтиқбўйи давлатлари ҳудудидан фойдаланиш режалаштирилган.
Манбада таъкидланишича, Киев расмийлари Латвия пойтахти Ригани Россияга қарши операциялар учун ўз ҳудудидан фойдаланишга кўндиришга уринган. Айни пайтда мазкур маълумотлар бўйича Латвия ёки Украина расмийларидан расмий изоҳ берилмаган.
Сўнгги ойларда Россия ва НАТОга аъзо Болтиқбўйи давлатлари ўртасидаги кескинлик янада кучайиб бораётгани кузатилмоқда.
