Хитойнинг Шинжон-Уйғур автоном районидаги туристик ҳудудлардан бирида осма кўприк узилиб кетди. Оқибатда 5 киши ҳалок бўлди. Бу ҳақда “Синхуа” нашри хабар берди.
Маълум қилинишича, воқеа 6 август куни Или шаҳрида юз берган. Осма арқонлардан бири узилиши оқибатида кўприк қийшайиб, одамлар сувга қулаб тушган. Оқибатда 24 киши жароҳат олган бўлиб, жами 29 киши кўприкдан йиқилган.
Уларнинг 22 нафари енгил, 2 нафари эса оғир аҳволда, 5 киши вафот этган. Жароҳат олганлар маҳаллий шифохонага ётқизилган. Ҳозирда жароҳатланганларга керакли ёрдамлар кўрсатилябди.
Ижтимоий тармоқларда тарқалган видеоларда узилган осма кўприкнинг бир томонга қийшайиб қолганини кўриш мумкин. Узилиш пайтида кўприкда қолган одамлар ён тўрдан ушлаб, нариги томонга ўтишга уринган. Кадрларда кўприк остида жабрланганларга ёрдам кўрсатилаётгани ҳам акс этган.
Маълумот учун, Хитойда чивинлар орқали юқадиган чикунгуня вируси кенг тарқалмоқда. Мамлакатда аллақачон 7 мингдан ортиқ киши касалликка чалинган. Ҳукумат ҳашаротларга қарши курашиш учун дорилар сепмоқда ва дронларни ишга солмоқда.
