Fitch халқаро рейтинг агентлиги Ўзбекистоннинг суверен кредит рейтинги прогнозини “Барқарор”дан “Ижобий”га оширди. Бу ҳақда расмий манбалар маълум қилди.
Қайд этилишича, 2025 йилда Ўзбекистоннинг кредит рейтинги BB- даражасидан BB даражасига кўтарилган эди. Агентликнинг бугунги қарори ўтган йил қайд этилган мазкур натижанинг мантиқий давоми сифатида баҳоланмоқда.
Fitch таҳлилчилари мураккаб глобал иқтисодий шароитга қарамай, Ўзбекистонда энергетика соҳасидаги ислоҳотлар, бюджет интизоми ҳамда хусусийлаштириш жараёнлари изчил давом эттирилаётганини юқори баҳолаган.
Президент Администрацияси раҳбари Саида Мирзиёеванинг таъкидлашича, “Ижобий” прогноз яқин келажакда мамлакат рейтинги янада юқорилаши мумкинлигини англатади.
“Бу мамлакатга кўпроқ хорижий сармоя жалб этиш, халқаро молия бозорларидан арзонроқ ресурслар олиш ва иқтисодиёт барқарорлигини таъминлаш учун халқаро ҳамкорларга кучли сигналдир”, деб ёзди у.
Саида Мирзиёевага кўра, Президент раҳбарлигида амалга оширилаётган тизимли ислоҳотларнинг асосий мақсади аҳоли фаровонлигини оширишдан иборат.
“Президентимиз бошчилигида олиб борилаётган ушбу тизимли ислоҳотларнинг ягона мақсади — ҳар бир юртдошимизнинг ҳаётини яхшилаш, фаровонлигини таъминлашдир. Бу йўлда жамоамиз билан бирга фақат олға қадам ташлаймиз”, дея таъкидлаган Саида Мирзиёева.
Мутахассислар фикрича, геосиёсий ва иқтисодий беқарорлик кучайиб бораётган бир пайтда Ўзбекистоннинг бундай натижага эришиши мамлакатда танланган тараққиёт йўли ва иқтисодий ислоҳотлар стратегияси самара бераётганини кўрсатади.
Шунингдек, иқтисодий барқарорлик ва молиявий мустаҳкамлик таълим, тиббиёт ва ижтимоий соҳалар ривожига ҳам ижобий таъсир кўрсатувчи муҳим омил сифатида баҳоланмоқда.
