АҚШ президенти Дональд Трамп Владимир Путин билан бўладиган учрашув якунида Украина бўйича ўт очишни тўхтатиш бўйича келишувга дарҳол эришиш қийин бўлишини айтди.
Унга кўра, Путин “келишув тузади” деган ишонч бор, бироқ бу саммитнинг ўзидаёқ амалга ошиши даргумон.
Трамп Путин ҳақида “У билади, мен унинг дуч келган энг қийин рақибиман” деди.
Оқ уй ва Кремль учрашув якунида ҳеч қандай ҳужжат имзоланиши режалаштирилмаганини билдирди. Россия президенти матбуот котиби Дмитрий Песковнинг сўзларига кўра, Анкориждаги музокаралардан сўнг икки етакчи умумий матбуот анжумани ўтказиши керак бўлади. Трамп эса буни тасдиқлашдан ҳам, рад этишдан ҳам тийилди.
Шунингдек, Трамп учрашув муваффақиятли бўлмаслиги эҳтимолини 25% деб баҳолади. Агар мулоқот натижа бермаса, АҚШ Россияга нисбатан янги санкциялар жорий қилишга тайёрлигини маълум қилди.
