19 августга ўтар кечаси Волгограддаги “Лукойл” компаниясига қарашли нефтни қайта ишлаш заводи (НҚИЗ)га дронлар зарбасидан сўнг ёнғин чиққани маълум қилинди. Бу ҳақда вилоят губернатори Андрей Бочаров баёнот берди.
Шунингдек, шаҳардаги 16-сонли касалхона биносининг том қисмида ҳам аланга чиққани тасдиқланди. Дастлабки маълумотларга кўра, жабрланганлар йўқ, беморлар бошқа бўлимларга кўчирилган.
Маҳаллий манбаларга кўра, Волгоград ва унинг атрофида бир кечада 15 дан ортиқ портлаш овозлари эшитилган. Россия Мудофаа вазирлиги тунги ҳужум чоғида 13 та дрон уриб туширилганини маълум қилган.
Мазкур НҚИЗ бир неча кун олдин ҳам ҳужумга учраган эди. Украина томони бу завод Россия армиясини ёқилғи билан таъминлаётганини билдирган.
