Бугун, 19 августдан бошлаб “Очиқ бюджет” порталида “Ташаббусли бюджет” жараёнларининг 2025 йилги 2-мавсуми доирасида саралаш босқичи якунланди ҳамда тарғибот босқичига старт берилди. Бу ҳақда Иқтисодиёт ва молия вазирлиги ахборот хизмати маълум қилди.
Унга кўра, 2-мавсум доирасида фуқаролар томонидан 22 минг 623 та таклиф келиб тушган ҳамда 18 минг 656 та таклиф саралаш босқичидан ўтказилган. Саралашдан ўтган лойиҳалар учун 3 кунлик тарғибот босқичи ўтказилади. Бунда ташаббускорлар саралашдан ўтган лойиҳаларни тарғиб қилиш орқали овоз бериш босқичига тайёргарлик кўради.
Маълумот учун, лойиҳа киритиш босқичи – 15 июль -3 август, саралаш босқичи – 4-18 август, тарғибот босқичи – 19-21 август, овоз бериш босқичи – 22-31 август кунлари ўтказилиши режалаштирилган.
Жорий йилдаги 2-мавсум ғолиблари 1 сентябрь – Мустақиллик байрами куни эълон қилинади.
