ДХХ чегара қўшинлари ва ички ишлар идоралари ҳамкорлигида Сурхондарё вилоятида ўтказилган тезкор тадбирда 2005–2006 йилларда туғилган икки нафар шахс 20 кгдан ортиқ “опий” ва 41 кг “гашиш”ни Тожикистондан олиб кириш пайтида ушланди. Кейинчалик уларнинг шериклари ҳам қўлга олинди.
Тошкент вилоятидаги операцияда эса Қозоғистон орқали мамлакатга кирган мармар тош ичига яширилган 7,9 кг “Мефедрон” топилди. Текширув жараёнида бу моддаларни Россиядан олиб келиб, Ўзбекистондаги харидорга етказиб бериш режаси фош этилди.
Шунингдек, Фарғона вилоятида афғонистонлик наркосавдогарлардан гиёҳвандлик воситалари олиб сотиш билан шуғулланган аёл ва унинг ўғли ҳам қўлга олинди. Улардан қарийб 10 кг “опий” ва “гашиш” мусодара қилинди.
Жами 79 кг 744 грамм гиёҳвандлик воситаси айланмасига чек қўйилди. Барча гумонланувчиларга нисбатан жиноят иши қўзғатилиб, қамоқ эҳтиёт чораси қўлланди.
