Президент Шавкат Мирзиёев очиқ мулоқотларда кўтарилган долзарб масалаларга жавобан тадбиркорлар учун солиқ енгилликлари жорий этилишини маълум қилди.
Эндиликда йилига 10 млрд сўмдан кам айланма қилувчи корхоналар фойда солиғи бўйича аванс тўловларидан озод этилади. Бу 14 мингга яқин тадбиркорнинг қўлида 1 триллион сўмлик айланма маблағ қолишини англатади.
Бундан ташқари, ҚҚС тизимига ўтаётган тадбиркорлар учун 1 йиллик “юмшоқ режим” жорий қилинади: фойда солиғи тўланмайди, хатолар учун жарима белгиланмайди, бухгалтерлар маоши солиқдан чегириб ташланади.
Энг муҳими, солиқ текширувларида аниқланган 16 триллион сўмлик хатолар бўйича жазолар бекор қилинади. Тадбиркорлар 1 ноябрга қадар камчиликларни ўзлари тузатиб, "тоза саҳифа"дан иш бошлаш имконига эга бўлади.
