Швеция ҳукумати 21 август куни мамлакатда янги авлод атом реакторлари қурилиши бошланишини эълон қилди.
Унга кўра, жануби-ғарбий ҳудудда жойлашган “Ringxals” АЭСда 3 дан 5 тагача кичик модуль реакторлар (СМР – small modular reactors) барпо этилади.
Улар тахминан 1500 мегаватт қувват ишлаб чиқаради, бу эса икки тўлиқ ҳажмдаги реакторга тенг.
Бу сўнгги 50 йил ичида мамлакатда қуриладиган илк атом реакторлари бўлади.
1980 йилда ўтказилган референдумда Швеция аҳолиси атом энергиясидан босқичма-босқич воз кечишга овоз берган ва шундан буён 12 реактордан 6 таси ёпилган эди.
Аммо бугунги кунда сиёсий кўпчилик қайта тикланувчи манбалар билан бирга атом энергетикасини ҳам ривожлантириш тарафдори — бу орқали фосил ёқилғиларга бўлган қарамликни камайтириш кўзда тутилмоқда.
Янги мини АЭСлар тахминан 2035 йилга бориб ишга туширилиши режалаштирилган. Уларнинг қурилиши анъанавий реакторларга нисбатан тез ва иқтисодий жиҳатдан арзонроқ бўлиши кутилмоқда.
