Америка Қўшма Штатлари Ўзбекистон билан мавжуд алоқаларни мустаҳкамлаш ва ўзаро манфаатли ҳамкорликнинг янги йўналишларини ривожлантиришга умид билдирмоқда. Бу ҳақда АҚШ Президенти Дональд Трампнинг Ўзбекистон Президенти Шавкат Мирзиёевга йўллаган табригида қайд этилган.
Трамп ўз табригида Ўзбекистоннинг бой тарихи ва маданиятини йодга олиб, мустақилликдан буён икки давлат ўртасидаги стратегик шериклик мустаҳкамланиб бораётганини таъкидлади.
Хусусан, чегараларни мустаҳкамлаш, савдо ва инвестицияларни кўпайтириш, диний эркинлик ҳамда минтақавий барқарорликни таъминлаш йўлида муҳим ҳамкорлик амалга оширилгани қайд этилди.
“Қўшма Штатлар мавжуд алоқаларни мустаҳкамлаш ва янги имкониятларни очишга интилади. Сизга ва Ўзбекистон халқига Мустақиллик байрами муносабати билан энг эзгу тилакларимни йўллайман”, — дейилади Трампнинг табригида.
