Бугун, 8 сентябрь куни соат 16:00 да жиноят ишлари бўйича Тошкент шаҳар Учтепа тумани судида диний олим ва блогер, “Азон Global” ахборот-таҳлилий портали асосчиси Мубашшир Аҳмад (Алишер Турсунов)нинг суди давом эттирилди. Бу ҳақда “Azon Global” маълум қилди.
Қайд этилишича, судда қатнашиш учун қатор жамоатчилик вакиллари, журналистлар ҳамда Мубашшир Аҳмаднинг яқин қариндошлари суд биноси олдида йиғилган. Судга кираётганлардан овоз ёзиш, тасвирга олиш ускуналари ҳамда қўл телефонларини топшириш сўралган.
Олдинги суд мажлиси жорий йилнинг 19 август куни гувоҳлар келмагани сабабли 8 сентябрга қолдирилган эди. Шунга қарамай, иккинчи суд мажлисида қатнашган гувоҳлар ҳам қўйилаётган айбловлар учун етарлича далил келтира олмаган.
Дастлабки маълумотларга кўра, шу боис ҳам Мубашшир Аҳмадга қўйилаётган айбловлар сирасидан “миллатлараро низо қўзғатиш” айблови олиб ташланган. Ўз навбатида гувоҳлардан бирининг даъвоси ҳам бекор қилинган.
“Афсуски суд мажлиси яна қолдирилиб, 15 сентябрда давом эттириладиган бўлди. Бунга устозни сўроқ қилишга вақт етмагани сабаб қилиб кўрсатилган”, — дейилади хабарда.
Маълумот учун, Алишер Турсуновга нисбатан Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) ва 244-3-моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш) билан жиноят иши қўзғатилиб, қамоққа олиш эҳтиёт чораси қўлланган.
