Нукус дала ўқув майдонида 10 сентябрь куни ташкиллаштирилган амалий ўқув машғулотида кичик портлаш юзага келиб, ўнга яқин ҳарбий хизматчи жароҳатланди. Бу ҳақда ЎзА хабар берди.
Маълум қилинишича, машғулот давомида ўқув машғулоти учун мўлжалланган портловчи махсус воситанинг детонация шнури чақнаши натижасида кичик портлаш юзага келиб, машғулот иштирокчиларидан 10 га яқин ҳарбий хизматчи турли даражадаги тан жароҳатлари олган.
Уларга ўз вақтида биринчи тиббий ёрдам кўрсатилган ва ҳозирда кўрилган зарур чоралар натижасида ҳарбий хизматчиларнинг соғлиги тикланмоқда.
Ҳолат юзасидан эса хизмат суриштируви тайинланган ҳозирда мутасадди раҳбарлар томонидан ўрганиш ишлари олиб борилмоқда.
