Ўзбекистонга хориждан пул ўтказмалари миқдори ўтган йилга нисбатан 23 фоизга ўсди
Ўзбекистонга хориждан пул ўтказмалари 2025 йил январь—август ойларида 12,1 млрд долларни ташкил этди. Марказий банк маълумотларига кўра, бу 2024 йилнинг шу даврига нисбатан 23 фоизга кўпдир.
Август ойигача трансферлар миқдори ойма-ой ўсиб борган:
• январда — $1,06 млрд;
• февралда — $1,07 млрд;
• мартда — $1,21 млрд;
• апрелда — $1,43 млрд;
• майда — $1,64 млрд;
• июнда — $1,78 млрд;
• июлда — $1,97 млрд;
• августда — $1,86 млрд.
Фақат августда ундан аввалги ойдаги ўсишга нисбатан паст кўрсаткич қайд этилган.
Биринчи ярим сентябрь Ўзбекистонга пул ўтказмалари 27 фоизга ошиб, 8,2 млрд долларга етганди. Бу борада Россия ҳали ҳам етакчиликни сақлаб келмоқда. Пул ўтказмаларининг 6,4 млрд доллари ёки 78 фоизи ушбу давлат ҳиссасига тўғри келади. Ундан кейинги ўринларда Қозоғистон, АҚШ, Жанубий Корея, Туркия, Буюк Британия, Қирғизистон, Литва ва бошқа давлатлардан пул жўнатилган.
Россияда мигрантларнинг топаётган иш ҳақидан юқори миқдорда хорижга пул ўтказиши тақиқланиши мумкин. Тегишли қонун лойиҳаси 9 сентябрь куни Давлат думасига киритилди. Унга кўра, мигрантлар ойлик даромадидан ортиқ маблағларни ўтказиш учун пул манбаининг қонунийлиги ҳақида декларация тақдим этиши керак. Таклиф яширин иқтисодиёт ва ноқонуний молиявий оқимларга қарши курашга қаратилган.
