Сирдарё вилояти Янгиер шаҳар Солиқ инспекцияси раҳбари тадбиркор аёлга шилқимлик қилгани учун ишдан олинди. Бу ҳақда Абдураҳмон Ташанов ўзининг Facebook саҳифасида маълум қилди.
Билдирилишича, Солиқ инспекцияси раҳбари А.Б. эри мусофирда бўлган тадбиркор аёлга нисбатан шилқимлик мазмунидаги SMS хабарлар ёзиб, ойлар давомида безовта қилган.
Собиқ мансабдор аёлнинг дўконига бир неча марта инспекторларни юбориб, ундан ташвишланаётгани ҳамда кечқурун чой баҳонасида гаплашиб олиши мумкинлигини ёзган. Аёл эса бу гаплардан ҳадиксираб, бироз муддат дўконига бормай юрган.
Шундан сўнг аёлнинг мурожаатлари асосида иш тегишли органлар томонидан ўрганиб чиқилган ва ходим билан меҳнат шартномаси бекор қилинган.
Тўпланган ҳужжатлар эса вилоят прокуратурасига, ундан Янгиер шаҳар судига юборилиб, Маъмурий жавобгарлик тўғрисидаги кодекснинг майда безориликни назарда тутувчи моддаси билан иш қўзғатилган.
