Президент Нобоа иштирок этган гуманитар кортежга Отавало шаҳрида 350 га яқин намойишчи тош ва Молотов коктейллари билан ҳужум қилди. Расмийлар орасида талафот йўқ.
Эквадор Президенти Даниэл Нобоанинг маълум қилишича, ҳужум кеча Отавало шаҳрида рўй берган. Кортеж таркибида Президент билан бирга БМТ ва Европа Иттифоқи вакиллари ҳамда Италия элчиси ҳам бўлган. Гуманитар миссияни бажараётган кортеж ҳарбийлар кузатувида ҳаракатланаётган вақтда, йўлни тўсиб олган 350 га яқин норозилар тошлар ва ёнғин чиқарувчи коктейллар билан ҳужум қилган.
Воқеа жойидан олинган суратларда кортеждаги машиналар ойналари синиб кетгани кўринади. Расмийларга зарар етмагани айтилмоқда.
Ҳужум Президентнинг дизель ёқилғисига берилаётган субсидияларни бекор қилиш ҳақидаги қароридан кейин авж олган норозилик намойишлари фонида содир бўлди. Эндиликда дизель нархи 1,8 доллардан 2,8 долларга кўтарилган. Норозилар муддатсиз иш ташлаш бошлаган ва бир нечта йўлларни тўсиб қўйган. Айрим ҳудудларда фавқулодда ҳолат эълон қилинган.
