Италиялик мураббий Фабио Каннаваро Ўзбекистон терма жамоаси бош мураббийига айланади. Бу ҳақда таниқли инсайдер Фабритсио Романо хабар берди.
Маълум қилинишича, италиялик мутахассис оғзаки равишда 2026-йилги Жаҳон Чемпионати доирасида Ўзбекистон миллий терма жамоасининг янги бош мураббийи бўлишга розилик билдирган. Шартнома бандлари юзасидан келишувга эришилган бўлиб, расмий ҳужжатлар 24–48 соат ичида имзоланиши кутилмоқда.
Аввалроқ бошқа бир инсайдер Николо Скира Каннаваро мураббийлар штабида ассистент сифатида Чиччо Троизе, жисмоний тайёргарлик бўйича мураббий сифатида эса Эугенио Албарелла фаолият юритиши мумкинлигини ва унинг расмий дебюти 13 октябрь куни Уругвайга қарши бўладиган ўртоқлик учрашувида амалга ошишини хабар берганди.
Маълумот учун, Каннаваронинг сўнгги иш жойи Хорватиянинг “Динамо Загреб” клуби бўлиб, у 2025 йил 9 апрель куни жамоанинг қониқарсиз натижалари сабабли лавозимидан озод этилган.
