Президент Шавкат Мирзиёев 6 октябрь куни сунъий интеллект соҳасини ривожлантириш бўйича тақдимот билан танишди. Соҳанинг инфратузилмасини кенгайтириш, малакали кадрлар тайёрлаш ва йирик лойиҳаларни қўллаб-қувватлаш бўйича янги режалар эълон қилинди.
Тақдимотда иқтисодиёт, соғлиқни сақлаш, таълим, транспорт каби йўналишларда сунъий интеллект асосида 86 та лойиҳа ишлаб чиқилгани ва уларни амалга ошириш учун 50 миллион доллар маблағ ажратилгани маълум қилинди. Бу лойиҳаларни қувватлаш учун мамлакатда суперкомпютер кластери ташкил этилмоқда.
Яна бир муҳим янгилик — 2027 йилгача 1 миллион нафар ёш сунъий интеллект соҳасида билим олишини назарда тутувчи “Бир миллион сунъий интеллект етакчилари” дастури давом этмоқда. Айни пайтда аистудй.уз ва омп.аистудй.уз платформаларида 5 та бепул онлайн курс фаол.
Бундан ташқари, “ҲеалтҳТеч AI Hackathon” муваффақиятли ўтказилгани айтилди. Яқин орада бундай хакатонлар таълим, суд тизими, тадбиркорлик каби соҳаларда ҳам ўтказилади.
Давлат раҳбари барча ташаббусларни қўллаб-қувватлаб, соҳага инвестицияларни жалб этиш, хорижий экспертлар билан ҳамкорликни кучайтириш ва информатика ўқитувчиларини қайта тайёрлаш бўйича аниқ топшириқлар берди.
