Тошкент вилояти ҳокими Зоир Мирзаев вилоятдаги бир нечта тумандаги давлат боғчаларида юз берган оммавий заҳарланиш ҳолатига муносабат билдириб, Соғлиқни сақлаш вазирлиги ҳузуридаги Санитария-эпидемиологик осойишталик қўмитасининг вилоят бошқармаси раҳбарлари ҳамда туман бўлими мутасаддиларини лавозимидан озод этиш зарурлигини таъкидлади. Бу ҳақда у 6 октябрь куни халқ депутатлари вилоят кенгаши сессиясида гапирди.
“Бизни ўшанда асради. Агар 5–6 миллиард сўмлик дори-дармон вақтида бўлмаганида, билмадим нима бўларди”, — дейди ҳоким.
Зоир Мирзаевнинг сўзларига кўра, заҳарланиш ҳолати бўйича жиноят иши қўзғатилган ва ҳозирга қадар 11 нафар шахс қамоққа олинган. Уларнинг аксарияти боғчаларни озиқ-овқат билан таъминлаб келаётган “outsourcing” компаниялари вакиллари экани айтилмоқда.
Эслатиб ўтамиз, 24 сентябрь куни Пискент ва Бўка туманларидаги бир нечта давлат боғчасида тарбияланувчилар соғлиғи ёмонлашиб, шифохонага ётқизилган эди. Расмий рақамларга кўра, заҳарланган болалар сони 1922 нафарни ташкил этган.
