Ҳукумат қарори билан “Ўзбекистонда аҳоли ва қишлоқ хўжалигини рўйхатга олишга тайёргарлик кўриш ва уни ўтказиш тартиби тўғрисида”ги низом тасдиқланди. Унга кўра, аҳолини рўйхатга олиш 2026 йил 15 январдан 28 февралга қадар, 45 кун мобайнида ўтказилади.
Рўйхатга олиш 2026 йил 15 январь соат 00:00 дан бошланади. Ушбу жараён давомида ҳар бир респондент доимий ёки вақтинча яшаш жойи бўйича қайд этилади. Бунда фуқаролар яшаб турган уй, хонадон ёки бошқа турар (нотўғри) жой яшаш манзили сифатида қабул қилинади.
Рўйхатга олиш натижаларида 15 январдан кейинги ўзгаришлар — яъни туғилган болалар ёки мамлакатни тарк этган шахслар — инобатга олинмайди. Бироқ ушбу санада вафот этганлар ҳақида маълумотлар киритилади.
Аҳоли сонини аниқлашда қуйидаги тоифадаги шахслар ҳисобга олинмайди:
мамлакат ташқарисида бир йилдан ортиқ вақтдан бери бўлган Ўзбекистон фуқаролари;
хорижий дипломатик ваколатхоналар ва халқаро ташкилотлар ходимлари ҳамда уларнинг оила аъзолари;
дипломатик иммунитетга эга шахслар.
Рўйхатга олиш жараёни “маҳалла еттилиги” тизими ходимлари орқали, планшетлар ёрдамида амалга оширилади. Бу ҳақдаги фармонни давлат раҳбари 2025 йил сентябрь ойи охирида имзолагани маълум.
