Эндиликда 14 ёшдан 18 ёшгача бўлган ёшлар ўз номига шахсий банк картаси очиши мумкин.
Адлия вазирлиги банк карталарининг чиқарилиши ва муомалада бўлишига оид янги тартибларни белгиловчи буйруқни давлат рўйхатидан ўтказди. Янги ҳужжат билан банк карталарининг турлари кенгайтирилди.
Эндиликда:
Бизнес банк картаси — якка тартибдаги тадбиркорлар ва ўзини ўзи банд қилган шахсларга ўз ҳисобидаги маблағларни бошқариш имконини беради;
Ижтимоий банк картаси — турли ижтимоий тўловлар ва нафақаларни қабул қилиш учун мўлжалланган.
Шунингдек, олдиндан эмиссия қилинадиган банк карталарини чиқариш ва уларни мобил иловалар орқали фойдаланувчини идентификация қилган ҳолда активлаштириш тартиби жорий этилди.
Энг муҳим янгилик — 14 ёшдан 18 ёшгача бўлган вояга етмаганлар энди мустақил равишда шахсий банк картасини очиши мумкин. 14 ёшгача бўлган болалар эса ота-онаси ёки қонуний вакилининг ёзма розилиги асосида банк картасига эга бўлади.
Бундан ташқари, янги тартибга кўра, юридик шахслар учун ичимлик ва оқова сув хизматлари учун тўловларни корпоратив банк карталари орқали амалга ошириш имконияти яратилди.
Марказий банкнинг сўнгги тадқиқотларига кўра, аҳолининг нақд пулдан фойдаланиш даражаси ҳудудлар бўйича фарқ қилса-да, электрон тўловларга бўлган қизиқиш йил сайин ортиб бормоқда.
