Тошкентда бўлиб ўтаётган Марказий Осиё давлатлари раҳбарларининг еттинчи Маслаҳат учрашуви иштирокчилари — Озарбайжон Президенти Илҳом Алиев, Тожикистон Президенти Эмомали Раҳмон, Қирғизистон Президенти Садир Жапаров ва Қозоғистон Президенти Қасим-Жомарт Тоқаев Президент Шавкат Мирзиёев ҳамроҳлигида Ислом цивилизацияси марказига ташриф буюрдилар.
Ўзбекистон Президенти ташаббуси билан барпо этилган мажмуа ислом цивилизацияси мероси, илмий тадқиқотлар ва таълим йўналишларини бирлаштирган илк комплекс ҳисобланади. Марказ миллий меъморий услуб ва замонавий ечимлар уйғунлигида барпо этилган.
Етакчилар Усмон Мусҳафи сақланаётган Қуръони карим зали, “Исломдан аввалги цивилизациялар”, “Биринч Ренессанс”, “Иккинчи Ренессанс” ҳамда “Янги Ўзбекистон – янги Ренессанс” бўлимлари билан танишди. Уларда Имом Бухорий, Имом Термизий, Мотуридий, Баҳоуддин Нақшбанд каби алломаларнинг бой мероси, шунингдек, турли сулолалар даврига оид қўлёзмалар намойиш қилинган.
Ташриф давомида етакчилар минтақадаги маданий ҳамкорликни мустаҳкамлаш, умумий меросни асраш ва маърифатпарвар лойиҳаларни қўллаб-қувватлаш муҳимлигини қайд этдилар.
