Швейцария АҚШ президенти Дональд Трамп билан муносабатларни юмшатиш ва мамлакатга нисбатан жорий этилган юқори божларни камайтириш учун мисли кўрилмаган тактикадан фойдаланди. “Axios” ёзишича, саноат етакчиларидан иборат махсус делегация Вашингтонга бориб, Трампка Rolex стол усти соати ва 1 килограммлик олтин қуймаси совға қилган. Қуйма устига Трампнинг президентлик тартиб рақамлари — 45 ва 47 рақамлари ўйиб ёзилган.
Маълумотларга кўра, совғалар 4 ноябр куни Оқ уйда ўтган учрашувда топширилган ва Трампнинг ўзидан яхши таассурот қолдирган. У учрашувдан сўнг делегацияни мақтаб, улар билан савдо ва савдо номутаносиблиги масалаларини муҳокама қилганини айтган.
Трамп 2025 йил август ойида Швейцария ва яна 64 давлатга нисбатан юқори божлар жорий қилган эди. Швейцария учун бу кўрсаткич 39 фоизни ташкил этган — Европадаги энг юқори божлардан бири. Божлар эълон қилинишидан бир кун олдин Швейцария президенти Карин Келлер-Зуттер Трампга қўнғироқ қилган, аммо суҳбат “жуда ёмон” кечгани билдирилган.
Шундан сўнг Швейцария дипломатик ёндашувни ўзгартириб, бизнес етакчилари орқали мулоқот қилишга қарор қилган. Делегация таркибида MKS SA, Rolex, Richemont ва Mercuria каби йирик компаниялар раҳбарлари бўлган.
Оқ уй расмийлари хабар беришича, Трамп совғаларни шахсий эмас, Президент кутубхонаси номидан қабул қилган — бу АҚШ қонунларига зид эмас. Қонунга кўра, президент 480 доллардан қиммат шахсий совғаларни ўзида сақлаб қолиши мумкин эмас.
Ўтказилган музокаралар ўз самарасини берди: 14 ноябрь куни АҚШ Швейцария маҳсулотларига қўйилган божларни 39 фоиздан 15 фоизга туширди. Бунга жавобан, Швейцария ўз савдо тўсиқларини юмшатишга ва АҚШга инвестициялар оширишга розилик билдирган.
