Хитой қирғоқни ҳимоя қилиш хизмати кемалари 16 ноябрь куни Сенкаку (хитойча — Дяоюйдао) ороллари яқинидаги Япония назоратидаги ҳудудий сувларга кириб борди. Бу ҳақда “Bloomberg” хабар берди.
Пекиннинг таъкидлашича, “патруллик” Хитойнинг “ҳуқуқ ва манфаатларини ҳимоя қилиш” мақсадида амалга оширилган. Япония эса мазкур ҳудудни ўз назоратидаги ҳудудий сувлар, деб ҳисоблайди.
Ҳодиса Токио ва Пекин ўртасидаги муносабатлар анча таранглашган бир пайтга тўғри келмоқда. Япония Бош вазири Санаэ Такаити 7 ноябрь куни парламентда Хитойнинг Тайванга эҳтимолий ҳужумига Токио ҳарбий жавоб қайтариши мумкинлигини истисно этмаган эди. Бу баёнот Пекинда қаттиқ норозилик уйғотди ва Хитой Япониядан бу позициядан воз кечишни талаб қилди, шунингдек, ўз фуқароларига Японияга бормасликни тавсия қилди.
Япония сиёсатида яна бир кескин нуқта — ядровий принципларни қайта кўриб чиқиш масаласи. Маълум бўлишича, Такаити 1967 йилда қабул қилинган уч “ядросиз принцип” — ядровий қуролга эга бўлмаслик, ишлаб чиқмаслик ва мамлакатга киритмаслик сиёсатини қайта муҳокама қилиш имкониятини ўрганмоқда. Токио бу тақиқ АҚШнинг ядровий тийиб туриш сиёсати самарадорлигини пасайтириши мумкинлигини таъкидлаяпти.
Ҳозирда АҚШ Япониядаги базалари ёки япон портларига кирувчи кемаларида ядровий қурол жойлаштира олмайди. Савол эса очиқ қолмоқда.
