Маросимда Греция, Индонезия, Латвия, Франция, Россия, Япония ва Тожикистон элчилари иштирок этди.
Президент янги раҳбарларга ўз миссияларида муваффақият тилаб, бугунги мураккаб геосиёсий вазиятда дипломатик ҳамкорликнинг янада муҳим аҳамият касб этаётганини таъкидлади.
Ўзбекистоннинг ташқи сиёсий ютуқлари қайд этилди
Давлат раҳбари сўнгги йилларда мамлакатда амалга оширилган туб ислоҳотлар ва халқаро нуфуз ошганини қайд этди:
БМТ Бош Ассамблеясининг 13 та резолюцияси қабул қилинган;
Барқарор ривожланиш индексда Ўзбекистон 19 поғона кўтарилган;
Камбағаллик даражаси 35 фоиздан 6,6 фоизга тушган;
Ташқи савдо айланмаси илк бор 66 млрд доллардан ошган;
100 та давлат учун визасиз режим жорий этилган.
Ҳар бир мамлакат билан икки томонлама муносабатлар муҳокама қилинди
Греция. Савдо ҳажми беш баробар ўсган. Энергетика, фармацевтика, IT ва транспорт соҳаларида ҳамкорлик кенгаймоқда. Тошкентда ўтказиладиган Ҳукуматлараро комиссия ва бизнес форуми муҳим аҳамият касб этади.
Индонезия. Савдо айланмаси 60 фоизга ошган. Декабрда тўғридан-тўғри авиақатновлар йўлга қўйилади. Келаси йили сиёсий маслаҳатлашувлар ва бизнес форумлар ўтказилади.
Латвия. Экспорт ва қўшма корхоналар сони 3 баробар кўпайган. Миграция бўйича келишув ва авиақатновларни кўпайтириш масалалари муҳокама қилинди.
Франция. Муносабатлар стратегик шериклик даражасига кўтарилган. 10 млрд долларлик лойиҳалар келишилган. Қўшма университет фаолият бошлаган. Келаси йили инвестиция кенгашининг илк йиғилиши ўтказилади.
Россия. Стратегик иттифоқчилик доирасида савдо ҳажми 12 млрд долларға яқинлашди. 3 мингдан зиёд қўшма корхона фаолият юритмоқда. Ҳудудлараро мулоқотни фаоллаштириш лозимлиги таъкидланди.
Япония. 8 млрд долларлик қўшма лойиҳалар амалга оширилмоқда. “Expo-2025” доирасида Ўзбекистон Миллий куни ўтказилди. Келаси ойда Токиода олий даражадаги музокаралар бўлади.
Тожикистон. Муносабатлар иттифоқчилик даражасига кўтарилган. Савдо ҳажми беш баробар ошиб, 1 млрд долларга яқинлашди. Чегараолди савдо зоналари товар айирбошлашни янада ошириши қайд этилди.
Маросим якунлари
Президент элчилардан ишбилармон доиралар, ҳудудлар ва хусусий сектор билан фаол ҳамкорлик қилишни сўради. Дипломатлар эса мамлакатимиздаги очиқ ва самарали фаолият учун шароит яратилгани учун миннатдорлик билдирди ҳамда Ўзбекистон билан кўп қиррали муносабатларни янада ривожлантиришга тайёр эканликларини таъкидлади.
