Самарқандда ота ўзининг икки ўғли билан юк машинасини ёқиб юборди. Ҳолат юзасидан Самарқанд вилоят ИИБ ахборот хизмати расмий маълумот берди.
Маълум қилинишича, жорий йилнинг 28 ноябрь куни соат 21:50да Тойлоқ тумани “Беклар" маҳалласи ҳудудида яшовчи 1985 й.т. фуқаро К.А. қўшни маҳаллада истиқомат қилувчи, ўзига олдиндан таниш бўлган 1990 й.т. Ғ.Р. ва 1991 й.т. Н.Р. лар билан ўрталарида юзага келган ўзаро келишмовчилик натижасида жанжал келиб чиққан.
Мазкур жанжалдан сўнг, К.А. ўзининг 2005 ва 2007 й.т. фарзандлари билан Ғ.Р ва Н.Р. лар бошқарувида бўлган юк автомашиналарига бензин ёқилғиси сепиб, ёқиб юборган.
Ёнғин зудлик билан бартараф этилиб, бошқа транспорт воситалари ва улардаги юкларга зарар етказилишининг олди олинган.
Мазкур ҳолат юзасидан 29 ноябрь куни Тойлоқ тумани ИИБ ҳузуридаги Тергов бўлинмаси томонидан Ўзбекистон Республикаси ЖКнинг 173-моддаси (Мулкни қасддан нобуд қилиш ёки унга зарар етказиш) 2-қисми билан жиноят иши қўзғатилиб, айбдор шахсларга нисбатан қамоққа олиш тарзидаги эҳтиёт чораси қўлланилган.
Ҳозирда дастлабки тергов ҳаракатлари олиб борилмоқда, дейилади хабарда.
