Ички ишлар органлари патрул-пост хизмати саф бўлинмалари ходимлари томонидан жамоат жойларида фуқароларни электрон идентификация қилиш тартиби тўғрисидаги низом тасдиқланди. Бу ҳақда Адлия вазирлиги хабар қилди.
Қайд этилишича, ходимлар қуйидаги ҳолларда фуқароларни тўхтатиши ва тегишли ҳужжатлар ёки “Э-патрул” тизими орқали уларнинг шахсини аниқлаши мумкин:
- шахс жиноят ёки маъмурий ҳуқуқбузарлик содир этган ёхуд қидирувда деб гумон қилиш учун асослар мавжуд бўлганда;
- шахсни содир этилган жиноят ёки маъмурий ҳуқуқбузарлик ҳақида маълумотга эга деб ҳисоблаш мумкин бўлганда;
- қонунга мувофиқ шахсни ушлаб туриш учун бошқа қонуний асослар мавжуд бўлганда.
Ходим шахсга уни тўхтатганлик ҳамда ундан шахсини аниқлаш талаб этилаётгани сабаби ва асосларини тушунтириб бериши шарт. Шунингдек, шахсига доир маълумотлар “Э-патрул” тизимига тўғри киритилишига патрул-пост хизмати ходими масъул ҳисобланади.
Бундан ташқари, ходим “Э-патрул” тизимидаги шахсга доир маълумотлар учинчи шахсларга ошкор этилмаслиги ҳамда ушбу маълумотлардан ғаразли мақсадларда фойдаланилмаслик учун жавобгардир.
Ички ишлар вазирлиги ҳамда Миллий гвардия томонидан жамоат жойларида — хиёбонлар, истироҳат боғлари ва бозорларда гиёҳвандлик воситалари ҳамда психотроп моддалар ноқонуний айланмасининг олдини олиш мақсадида хизмат итларидан фойдаланиш тартибини белгиловчи қўшма қарор қабул қилингани хабар қилинганди.
